يافندى ياللى أبوك باعتك تتعلم طب
وسايب العلم وداير تعشق وتحب
سبع سنين فاتت وأنت تغطس ماتقب
خليت أبوك من مصروفك يكفر ويسب
سيبك بقى من الغربة وأرجع بيع لب
وأن شفت فى مصر بطاله أقعد بطال
دى مصر عايزه رجاله مش عايزه عيال
****************
وحضرتك ياللى بتدرس فى أوربا حقوق
بتعط من قهوة لقهوة سكران ما تفوق
ان كان قانونك يسكت لك انا اقول مخنوق
والله اللى جابك من ضهره ماخد الا خذوق
رجعت له بفرق وقصه وشنب محلوق
وتنجعص له فى الصاله تقرا الجرنال
دى مصر عاوزه رجاله مش عاوزه عيال
****************
وحضرتك ياللى بتدرس فن الدوبيا
وتحت باطك لرفايقك دفتر كوبيا
تاكل فراخ وأبوك قاعد ياكل لوبيا
وتشرب البيرة وهو بيشرب سوبيا
حتى السيجارة ماتشربها الا زنوبيا
وأخرتها تخدم فى وكاله بتمانيه ريال
دى مصر عاوزه رجاله مش عاوزه عيال
****************
أما أسمه أيه اللى عاملى عظيم
قال فى الزراعة بيتعلم علم التطعيم
يقول لى طعم التين يشبه طعم البرسيم
والفلح لما بيربى بيربى بهيم
يطلع يبرطع فى الغربة من غير تعليم
والساقية مدام شغاله والطور شغال
دى مصر عاوزه رجاله مش عاوزه عيال
******************
فلوس بتورد من كايرو تحاويل على البنك
كتير ومين عارف يمكن ميت ألف فرنك
مع الواد بيبعترها بين هنك ودنك
يحط للمشروب عشرة والجرسونك سنك
ويعشها زايط هايص وقرايبة فى ضنك
تقول اذا شفت الحاله ياخسارة المال
دى مصر عاوزة رجاله مش عاوزه عيال
